I Gəncə Kitab Sərgisi başa çatdı.

26-28 noyabr tarixlərində Gəncədə Azərbaycan Nəşriyyatları Assosiasiyasının təşəbbüsü və təşkilatçılığı, Mədəniyyət Nazirliyinin, Gəncə şəhər İcra Hakimiyyətinin və Gəncə İctimai İştirakçılıq Məclisinin təşkilati dəstəyi ilə gerçəkləşən “I Gəncə Kitab Sərgisi” arxada unudulmaz xatirələr qoyaraq başa çatdı.

Nəzərinizə çatdıraq ki, Nizami yurdunda 1984-cü ildən bəri keçirilən ilk sərgidə Bookzone.az kitab evi və “İZ nəşriyyatı” da müvəfəqiyyətlə iştirak etdi. Belə ki, sərgidə böyük rəğbət görən məhsullarımız arasında artıq 3-cü dəfə “İZ nəşriyyatı” tərəfindən nəşr edilmiş Ağ Zanbaqlar Ölkəsi, Ölümsüz Ailə, eləcə də, yeni məhsullarımızdan Marvel seriyalı qeyd dəftərlərimiz və "kraft" tipli qeyd dəftərlərimiz oxucuların diqqətini çəkdi.

Sonralıqla, qeyd etmək istərdik ki, Gəncə Dövlət Filarmoniyasının Urban Mərkəzinin geniş salonunda keçirilən, dahi mütəfəkkirimiz Nizami Gəncəvinin 880 illik yubileyinə ithaf olunan sərgidə ölkənin 30-dan artıq nəşriyyatı və kitab evi iştirak edib.

Sərginin açılışına şəhər rəhbəri Niyazi Bayramov, Gəncədən seçilmiş millət vəkilləri, qardaş Türkiyənin Gəncədəki Baş konsulu Zəki Öztürk, təşkilatçı qurumların nümayəndələri qatılmışdılar. Eləcə də, 44 günlük “İkinci Qarabağ müharibəsi” də şəhid olmuş igidlərimizin yaxınlarının da sərgini ziyarət etməsi çox şərəfli olub.

“I Gəncə Kitab Sərgi” də ümumilikdə 39 nəşriyyat və kitab mağazısı iştirak edib.

3 gün müddətində 38 tədbir (seminar, görüş, imza, şeir gecəsi, müzakirə və s.) keçirilib.

Naşirlərdən əlavə bu müddətdə 50-dən çox tanınmış ziyalı Gəncə oxucuları ilə görüşə gəlib. Sərgidə Rövşən Abdullaoğlu, Varis Yolçuyev, Nüşabə Məmmədli, Dilşad Talıbova, Rəsul Həsən, Təbriz Hacınski, Əkbər Nəcəf, Elxan Elatlı və digər ziyalılarımızın iştirakı da baş tutub.

“Əsas hesablama, necə deyərlər, kassa hesablaması deyil, əslində, kim nə satdı, kim nə aldı, bununla işimiz yoxdur. Əsas odur ki, Gəncə özü kitabla aydınlandı. Onunla gün üzünə çıxdı gəncəlilər. Bu baxımdan, fikrimizcə, sərginin müvəfəqqiyətindən söz açmaq olar. Eləcə də, çətin sosial vəziyyət səbəbindən istehlak səbətini çox məhdud formalaşdıran, yəni əlindəki pulu çox qənaətlə xərcləməyə məcbur olan insanlar belə bu üç gündə kitab aldı, "ona xərclənən pula heyifdir" demədi. Deməli, insanlar mənəvi zənginliyi, gələcəyə inamı qoruyurlar. Odur ki, nikbinlik üçün əsas var!” - deyə Gəncə İctimai İştirakçılıq Məclisinin üzvü Vüqar İsgəndərov bildirib.

Xülasə, belə tədbirlərin və sərgilərin bölgələrimizdə keçirilməsi təqdirəlayiq addımdır. Əminik ki, gələcək günlərdə də belə, hətta bundan da böyük sərgilər təşkil ediləcək və Bookzone "kitab evi" və İZ nəşriyyatı olaraq biz də oxumağa təbliği artırmağa dəstək olacağıq.

Gələcək sərgilərdə görüşənədək, Bookzone...