Fəlsəfə

Hər hansı bir filosofun şəxsiyyətini, həyat yolunu onun fəlsəfəsindən ayırmaq çox çətindir. Amma gəlin bir düşünək: bunları bir-birindən ayırmaq ümumiyyətlə lazımdırmı? Bunları yanaşı öyrənməyin nə ziyanı var ki? Ziyanı yoxdur, amma xeyri böyükdür. Bu iki şeyi paralel öyrənmək bizə çox mətləbləri başa salır, çox məqamları dərk edə bilirik: filosof öz fəlsəfəsini anladır, fəlsəfə isə onu yaradan filosofu tanıdır. Odur ki, bu kitabdakı hər hekayə konkret bir filosofa həsr olunub; onun həyatından, ən dəyərli fikirlərindən bəhs edir; əsrlərdən bəri ucaldılan “fəlsəfə məbədi”nin təməlinə, divarlarına məhz onun qoyduğu daşdan, yaxud daşlardan söz açır.