Gəncədə kitab bayramı
26-28 noyabr tarixlərində arasında Gəncə şəhərində “I Gəncə Kitab Sərgisi” kitab sərgisi keçiriləcək. Bu sərgidə “Bookzone” və “İz nəşriyyatı” olaraq biz də iştirak edəcəyik.
Əvvəla qeyd etmək lazımdır ki, Bakıdan kənarda da belə tədbirlərin təşkil edilməsi sevindirici haldır. Təşkilatçılığını “Azərbaycan Nəşriyyatları” İctimai Birliyinin (ANİB)-in öhdəsinə götürdüyü “I Gəncə Kitab Sərgisi” də 30-dan artıq nəşriyyat, 10-dan artıq kitab evi iştirak edəcək.
Bir millətin oxuma-yazma vərdişi onu ən uca zirvələrə çıxara biləcək xüsusiyyətlərdən biridir. Çünki dahi Nizaminin də dediyi kimi, "Qüvvət elmdədir, başqa cür heç kəs heç kəsə üstünlük eyləyə bilməz...".
Nizamidən söz açmışkən, tədbirin onun 880 illik yubileyi zamanı dahi ədibimizin vətənində keçirilməsi xoş bir təsadüfdür. 2021-ci ilin “ Nizami ili” elan edilməsinin mədəniyyət sahəsində çiçəklənməyə verdiyi təkan nəzərə çarpır. Bu il keçirilən tədbirlərin və təməli qoyulan yeniliklərin gələcək illərdə daha da inkişaf edəcəyinə şüphə yoxdur.
Eləcə də, ANİB-in yeni layihəsi “ Öz kitabını sat” guşəsində insanlar öz kitablarını sata biləcəklər, eləcə də Qarabağa kitabla gedirik stendində Qarabağda yaradılacaq kitab fondları üçün kitablar toplanacaq.
Sərgidə kitablara 50%-dək endirim tətbiq olunacaq, məşhur şair və yazıçıların iştirakı ilə təqdimatlar, imza mərasimləri, şeir gecələri, uşaqlar üçün nağıl saatları, rəssamların, müxtəlif sənət nümayəndələrinin əsərlərindən ibarət sərginin təşkili və musiqi proqramları keçiriləcək.
Bookzone kitab evinin rəhbəri Seymur Tağıyev növbəti kitab sərgisi haqqında bu fikirləri bildirdi, “ Bu artıq il ərzində keçirilən 3-cü kitab sərgisidir. Bu sərgilərə göstərilən maraq xalqımızın oxumağa olan həvəsinin əyani sübutudur. Biz kitabçılar olaraq bu tələbatı – həvəsi – qarşılamağa, və xalqımızı oxumağa təşviq etməyə çalışacağıq. Eləcə də, belə tədbirlərin bölgələrdə də keçirilməyə başlanması də mötəbər hallardan biridir.”
ANİB-in sədri Şəmil Sadiq qeyd edib ki, “Oxucular yeni kitablarla tanış olacaq, endirimlərdən yararlanacaqlar. Ən təbii istəyimiz “Nizami Gəncəvi İli”ndə, Nizami yurdunda möhtəşəm kitab bayramı təşkil edərək yerli kitabsevərləri sevindirməkdir”.
“I Gəncə Kitab Sərgisi”nin təşkilat qrupunun rəhbəri Nurman Tariq açıqlamasında bildirib ki, “ANİB tərəfindən 30-31 oktyabr tarixlərində Sumqayıt şəhərində təşkil olunmuş kitab sərgisi xoş xatirələrlə yadda qaldı və bu sərgi sübut etdi ki, bölgələrimizdə də kifayət qədər oxucu var, sadəcə kitab onlar üçün əlçatan deyil. Bunun üçün də ANİB olaraq hədəfimiz nəşriyyat və yazıçılarla birlikdə bölgə-bölgə gəzmək, kitabı bölgələrimizə yaymaqdır. Kitabçılıq başqa cür inkişaf etməyəcək. Budəfəki dayanacağımız isə mədəniyyət şəhərimiz Gəncədir. Günlərdir hazırlaşırıq, əminəm ki, bu sərgi də möhtəşəm olacaq”.
Sərgidə görüşənədək...
