Azərbaycan Xalq Cümhuriyyəti - Geniş xronoloji icmal

Bir kərə yüksələn bayraq bir daha enməz!

1918-ci ilin may ayının 28-də Azərbaycan xalqının öz müstəqilliyini elan etməsi və demokratik respublikanın qurulması, dövrün mövcud tarixi şəraitinə nəzər saldığımızda bu gün bizə möcüzə təsiri bağışlayır. Lakin bu bir röya deyildi, Şərqdə ilk demokratik respublikanın bayrağı ucaldılmışdı, cəmi 2 il yaşamasına baxmayaraq, Azərbaycan hökuməti çox böyük işlərə imza atmış, ən önəmlisi isə, bugünkü Azərbaycan Respublikasının təməlini meydana gətirmişdi. Uzaqgörənliklə söylənmiş "Bir kərə yüksələn bayraq bir daha enməz" şüarı həyatda öz təsdiqini tapmışdı. 

Lakin, şanlı Cümhuriyyət tariximiz haqqında çox saylı araşdırmalar aparılsa da, hər dəfə yeni-yeni faktlarla rastlaşanda bu tarix haqqında biliklərimizin nə qədər yetərsiz olduğunu etiraf etmək məcburiyyətində qalırıq. İnanılmaz olan o hadisə necə baş verdi? Cümhuriyyət 2 il boyunca necə yaşadı və nə üçün süqut etdi? Oxuculara təqdim etdiyimiz "Azərbaycan Xalq Cümhuriyyəti - geniş xronoloii icmal" adlı bu kitab da bilmədiyimiz bir çox hadisələrə işıq salmaqda bizə yardımçı olacaqdır.